Co eleger?

Wie wählen? Eidgenössische Wahlen 2019

pass Nr. 1 Ta prepara! 

Ils 20 d'october 2019 han lieu elecziuns federalas – nus elegiain da nov il Cussegl naziunal ed il Cussegl dals chantuns. Avra tia cuverta da votar en il lieu marcà, uschia che ti la pos a la fin puspè serrar.

Pass nr. 2Eleger il Cussegl naziunal

Ti survegns differentas glistas da partidas prestampadas ed ina glista vida. Eleger pos ti però mo cun ina glista.

Pussaivladad 1: Glista senza midadas

Prenda la glista prestampada da la partida che persvada tai il pli fitg e na fai naginas midadas. Uschia elegias ti tut las candidatas ed ils candidats che la partida propona. Ti das tut las vuschs da partida a questa partida.

Pussaivladad 2: Glista vida

La glista vida pos ti emplenir cumplettamain a maun.

Pussaivladad 3: Modifitgar la glista

Prenda ina glista prestampada ed adattescha ella a maun da tes giavischs. Ti sas:

  •  stritgar: sche ti na vuls betg eleger candidatas e candidats, pos ti stritgar lur num.
  • cumular: ti sas metter candidatas e candidats ina segunda giada sin la glista. Uschia survegnan els duas vuschs da tai.
  • panaschar: ti dastgas era nudar candidatas e candidats dad autras partidas sin tia glista tschernida. Uschia das ti a pliras partidas tias vuschs da partida.
  • num da la partida: quel pos ti midar sisum la glista – n'emblida betg da nudar er il numer da glista da la partida. Sche ti has lingias vidas sin tia glista, survegn la partida nudada questas vuschs.

Glista da controlla

  • Nudar mintga candidata/candidat max. duas giadas.
  • Nudar maximalmain tants nums sco quai che stattan a disposiziun lingias.
  • Nudar almain ina candidata/in candidat.
  • Nudar mo candidatas/candidats uffizials da tes chantun cun il numer da candidat.  

Pass nr. 3Eleger il Cussegl dals chantuns 

En ils blers chantuns elegias ti duas persunas en il Cussegl dals chantuns – en ils sis mezs chantuns mo ina persuna. Per l'elecziun dal Cussegl dals chantuns datti tut tenor chantun autras reglas. Legia perquai las infurmaziuns en tes material electoral. Tut tenor chantun vesa tes cedel d'elecziun ora auter:

Cedel d'elecziun vid

Noda a maun sin las lingias vidas ils nums da las candidatas e dals candidats che ti vuls eleger.

Glista per far cruschs  

Noda cun ina crusch il champ dasper las candidatas ed ils candidats che ti vuls eleger. Sch'igl ha ulteriuras lingias vidas, pos ti nudar a maun ulteriuras candidatas ed ulteriurs candidats.  

Checkliste

  • Nudar tut las candidatas ed ils candidats mo ina giada.
  • Nudar maximalmain tantas persunas sco quai ch'èn d'occupar sezs.
  • T'infurmescha, schebain ti pos eleger en tes chantun mintga persuna cun dretg da votar u sulettamain candidatas e candidats uffizials.  

Pass nr. 4Controllar, suttascriver, serrar 

  • Has ti emplenì tuts dus cedels electorals a moda correcta ed a maun?
  • Suttascriver l'attest da votar u il champ previs.
  • Metta ils dus cedels electorals en la cuverta pitschna e serra quella. En tscherts chantuns na datti betg ina cuverta speziala, mabain in caum spezial per ils cedels electorals. La cuverta pitschna e l'attest da votar mettas ti uss en la cuverta gronda.  

Pass nr. 5Consegnar e finì! 

Per posta

È la cuverta gia francada? Sche betg, tatga si ina marca postala. Bitta tia cuverta da votar en la proxima chascha da brevs.

A l'urna

Consegna persunalmain tia cuverta da votar a l'urna u en chanzlia communala. Las infurmaziuns tge che ti stos tut prender cun tai e fin cura ch'igl è pussaivel da vuschar, pos ti leger en tes material electoral.